正式開通！直達K11 ECOAST同前海山姆！近排港人北上深圳鍾意去山姆、Costco同盒馬鮮生呢類大型超市，最近深圳巴士集團正式開通咗兩條假日便民遊購線路，分別係「前海郵輪通」同「山姆口岸通」，重係免費㗎！呢兩條線會喺週末、法定假日同香港公眾假期運行，將郵輪中心、深圳灣口岸同前海商圈、公園連埋一齊，等大家同港人朋友出行更方便！
搭「前海郵輪通」可以輕鬆玩轉深圳國際郵輪母港，去亞洲首座濱海K11打卡，睇埋海上世界嘅浪漫燈光音樂噴泉，再去萬象前海感受商圈活力，仲可以去前海石公園享受濱海風光，一次過滿足幾種玩樂體驗！「山姆口岸通」就適合成日去前海買嘢嘅你，開通之後大家同港人朋友可以輕鬆去到萬象前海、前海山姆呢啲前海熱門商圈，滿足休閒旅遊同購物消費嘅需要！以上兩條線嘅乘客可以喺桂灣地鐵站或者前灣地鐵站，搭巴士好快就到前海石公園。
山姆口岸通
站點︰深圳灣口岸公交站、前灣地鐵站、桂灣地鐵站、萬象前海、前海山姆、深圳灣口岸公交站
服務時間：週末、法定節日假期同香港公眾假期 朝早9:30到夜晚7:30
車費︰免費
前海郵輪通
站點︰蛇口郵輪中心、前海嘉里、桂灣地鐵站、萬象前海、深港青年夢工場北區
服務時間：週末、法定節日假期同香港公眾假期 朝早10:30到下晝6:30
車費︰免費
資料／圖片來源：深圳交通、深圳巴士集團
