香港各區酒店同餐廳嘅自助餐優惠多到眼花繚亂，想知邊間buffet食物質素最好、最抵食？或者想同班friend盡情食餐勁慶祝下？小編幫大家整理咗多間酒店同餐廳嘅自助餐推介，最平$96就食到高質Buffet，任食多款海鮮、生蠔、牛扒、和牛、大閘蟹、火鍋、Omakase壽司、泰國菜、醬油蟹、醬油蝦等美食，即刻睇價錢同點樣預訂（持續更新）
東涌福朋喜來登酒店$96自助餐！任食蛇羹、臘味飯炸大腸
東涌福朋喜來登酒店自助餐廳「御廚」由即日至11月30號再度推出港式風味自助餐，有多款港式美食包括蛇羹、臘味飯、羊腩煲、生炸雞髀、龜苓膏同芝麻卷等，週末仲會供應烤肉。而家官網預訂有9折/買3送1優惠，午市9折最平$384四位，平均每位$96，仲包加一，真係平到笑！
香港萬麗海景酒店全新自助餐優惠 7折歎海膽魚子醬＋龍蝦和牛
灣仔香港萬麗海景酒店自助餐全新升級！全新Buffet概念「Food Studio」，以互動式餐飲為主題，設有開放式廚房，等客人可以近距離睇住廚師即場煮嘢同擺盤，仲有大量海膽、魚子醬、新鮮龍蝦同和牛主題菜式，必試海膽魚子醬Taco、龍蝦伊麵、即蒸新鮮龍蝦、烤和牛牛板腱同香脆乳豬等，更有75折開幕早鳥優惠，唔好錯過！
香港JW萬豪酒店JW咖啡室全新升級
香港JW萬豪酒店JW咖啡室自助餐由10月1號全新升級回歸！一入餐廳就會見到多個自助餐桌同互動烹調站，重點有冰凍海產、即煮麵檔同即席切肉專櫃（可以食到香煎澳洲和牛扒、香草烤羊架）。仲有特色中式海味菜式，包括新推出古法燜南非鮑魚滑雞、野米濃湯燴花膠火腿、原盅佛跳牆、花雕酒醉蝦、鮑汁燜海參鵝掌、蒸本地綠洲龍躉斑球，更有燒味區嘅片皮鴨、燒乳鴿同香烤叉燒等！更首次引入廚師發辦料理，由師傅用當造頂級食材，每晚即場整兩款限定驚喜菜式，例如龍蝦刺身、牡丹蝦海膽壽司、鮮象拔蚌椒麻醬油漬刺身、真鯛刺身、日本A5和牛壽司同海膽燉蛋等！
香港喜來登酒店環球珍蟹百味自助餐
香港喜來登酒店咖啡廳有蟹宴自助餐！由即日起到11月30號，咖啡廳 (The Café) 推出期間限定「環球珍蟹百味自助餐」，用肥美當造蟹類做主題，包括阿拉斯加帝王蟹、大閘蟹、鱈場蟹、麵包蟹同紅蟹。必食避風塘炒紅蟹、蟹肉蟹黃蒸糯米飯、咖喱麵包蟹配大麵包同泰式青咖喱軟殼蟹、鐵板燒阿拉斯加帝王蟹蟹腳、拉斯加帝王蟹蟹肉蟹籽大阪燒等！仲有每位一隻清蒸鮮活大閘蟹！網上商店預訂更有買二送一獨家優惠！
尖沙咀Hotel ICON環球蟹宴
The Market 推出全新「阿拉斯加帝王環球蟹宴」自助餐，精選菜式包括：「蟹肉燉蛋」、「法國蜘蛛蟹海鮮粥」、「海南雞伴蟹黃飯」、「火焰西班牙海鮮法國蜘蛛蟹黃飯」、「即燒阿拉斯加蟹腳」、「加拿大長腳蟹」、「薑葱炒蟹」或「黃金炒蟹」等！仲有各式刺身/壽司、冰鎮海鮮等冷盤、燉湯、印度咖喱同GODIVA雪糕等不停供應！
香港W酒店薄餅大師Paolo意式自助餐
香港W酒店嘅KITCHEN自助餐推出「La Tavola Italiana」意式自助餐，菜單由意大利行政總廚Francesco Greco設計，更邀請到香港頂尖薄餅大師Paolo（全港薄餅師傅排名第二）一齊打造意式美食體驗。今次自助餐設有多個即席烹調專區，包括手工意大利麵、傳統烤肉同即烤薄餅，等客人有得互動咁享用，由即日至 11月30號供應！
洲至奢選香港WM酒店金秋蟹香自助晚餐
洲至奢選香港WM酒店WM咖啡廳推出全新「金秋蟹香自助晚餐」，以肥美秋蟹做主題，週一至週四自助晚餐特設經典焗釀蟹蓋，週五至週日及公眾假期每位大人就會有清蒸大閘蟹一隻，任食菜式包括加拿大松葉蟹腳、法國麵包蟹、北海道帶子蟹膏手卷、即製蟹粉蟹肉流沙天使麵、蟹粉小籠包等。仲有即開新鮮生蠔、冰鎮海鮮同刺身供應，即日至11月30號期間用優惠碼官網預訂可享68折優惠！
陶源酒家 兩小時任食大閘蟹放題
陶源酒家推出嘅大閘蟹任食放題即日起以更豐富菜色回歸，今年驚喜在於「冷熱兩食」新體驗！除咗經典清蒸大閘蟹、太雕蒸大閘蟹同油鹽焗大閘蟹外，特別新增「花雕熟醉蟹」，用陳年花雕酒醃製，加多種香料，蟹肉吸收酒香精華，冰鎮後食，鮮甜彈牙！每位客人仲可以享用特盛三式，包括鮑汁扣原隻鮑魚伴椎茸、蟹粉瀑布及蟹肉椰菜粉絲，份量十足，喺灣仔、旺角同尖沙咀分店供應。
尖沙咀泰國菜放題 $328任食4小時泰式小食
尖沙咀泰國菜放題｜如果你想週末放鬆下，享受一頓豐富早午餐，Mira Dining旗下摩登泰菜Mue Mue推出泰式「嘆」週末早午餐，提供多款泰式同東南亞美食，最吸引係客人可以任食多款泰式小食，包括泰式青醬生蝦、炭燒豬頸肉沙律、香烤沙嗲牛雞串等，由開胃前菜到濃郁湯品、自選主菜同透心涼甜品都可以自選一款，食足4個鐘！
佐敦「醬缸韓國料理」$468起任食醬油蟹＋醬油蝦
無限任食醬油蟹唔係夢！佐敦知名韓國餐廳「醬缸韓國料理」新推出任食醬油蟹放題，$468就可以90分鐘無限任食醬油蟹同醬油蝦，價錢仲包任食辣醬蟹、泡菜餅、炒年糕、炒粉絲等，喺threads掀起熱話，討論度極高！
港島新開即撈海鮮放題西城水產！$268起任食澳洲和牛＋生猛海鮮
又新開一間即撈海鮮火鍋放題！堅尼地城新開主打即撈海鮮火鍋放題餐廳「西城水產海鮮火鍋放題」，最平$268起即可無限追加澳洲M5和牛同生猛海鮮，仲包過百款火鍋配料，港島街坊有福喇！
中環唐述全新早午餐菜單！任食超過20款精緻點心＋中式甜品
中環高級中菜食府「唐述」，新推出全新夏季「粵韻飄香週末早午餐」，任食20多款手工點心、小食同中式甜品，仲有精選前菜、滋補湯品、自選主菜等，經eShop預購更可享免加一服務費，即刻睇詳情！
湊湊火鍋$128台式夜市任飲任食！
湊湊火鍋最近推出$128台式夜市任飲任食放題，當中有幾十款台式經典美食、小食、手搖茶，由台式紅燒牛肉麵到台南鹽酥雞，再到冰凍生啤或珍珠奶茶等等，全場任食任飲，即睇！
人氣扒房The Grill Room$298任食澳洲M7和牛＋意大利粉
The Grill Room 係尖沙咀同銅鑼灣知名扒房餐廳，以結合法國同澳洲風味牛扒料理出名。而兩間餐廳嘅任食牛扒推廣特別吸引，每位$298即可任食3款澳洲和牛以及意大利粉，threads上有唔少網民分享「戰績」，牛扒賣相唔錯！
中環西餐廳$108半自助午餐！任食沙律吧＋魚子醬撻＋自選主菜牛扒
中環復古時尚西餐廳Mojo Bistro，最近新推出$108半自助午餐，客人可以任食沙律吧、炸物、甜品、湯，另可自選主菜如意大利粉、烤澳洲豬扒、美國板腱牛扒等，仲可以任飲咖啡、茶同果汁，性價比高，中環打工仔唔好錯過！
銅鑼灣肉佐 和牛壽喜燒放題店任食厚切牛舌檸檬/和牛＋小童免費
銅鑼灣和牛壽喜燒放題店「NIKUSA 肉佐」，由來自京都日籍米芝蓮星級懷石料理大師長本輝彥先生設計同秘製招牌壽喜燒醬汁，餐廳共5個唔同級別Menu，有多達 140 款菜式同食材，當中最吸引、最豪莫過於Level 5 超豪快極上放題菜單，可喺150 分鐘無限量追加達到滿分 BMS 12 宮城縣產仙台 A5 霜降黑毛和牛放題，最吸引係有得任食牛舌檸檬同任食刺身壽司、優質肉類、高質海鮮同火鍋放題等，高質之選更成為Threads友大力推介，大胃王、愛任食必去！
九龍灣千之味居食屋推出$188壽司放題
千之味居食屋最近推出$188壽司放題，客人可以60分鐘內無限量享用共50款食品，包括壽司、炸物、小食等。優惠喺九龍灣、大埔同元朗分店供應，星期一至日全日供應，大家要注意喇！
佐賀燒肉谷全新生蠔＋日本和牛燒肉放題！無限追加過百款食品
人氣日本燒肉放題「佐賀燒肉谷」最近新推出全新生蠔海鮮祭，引入日本兵庫縣同韓國上品生蠔，只要惠顧指定放題套餐，可以任食日本A4和牛外，仲可以無限量任食生蠔，仲有過百款食品，生蠔海鮮控唔好錯過！
即撈海鮮火鍋放題店葵芳開分店！$298任食海鮮＋過百款配料
即撈海鮮火鍋放題店「大西洋火鍋」喺葵芳開分店！餐廳主打$298即可2小時任食多達7款生猛海鮮，現場自己即撈活海鮮，另外仲包任食近過百款火鍋配料、熟食、 甜品、榴蓮同飲品，椰青同啤酒都無限暢飲，新店開張仲有限時8折優惠，而且開到凌晨3點，各位海鮮火鍋愛好者唔好錯過！
美登利$298任食100分鐘壽司放題
梅丘壽司美登利總本店重磅回歸，再次推出壽司放題優惠！只需$298起就可以喺100分鐘內無限享用超過100款日式料理，包括頂級刺身、各式手握壽司、創意卷物，以及多款炸物同燒物。此外，每位食客仲可以額外獲送時令刺身、特選壽司等，每週四推出，需要上網預先訂位！
尖沙咀凱悅酒店任食牛扒薯條！無限量供應沙律/甜品/葡萄酒
尖沙咀凱悅酒店推出任食牛扒薯條菜單，希戈餐廳逢星期二晚有「任食牛排及薯條夜」，源源不絕送上優質黑安格斯牛扒同Frites Atelier美味法式薯條，除咗任食牛扒外，更有品酒師精選美酒任飲，機會難逢！
麗晶酒店日本餐廳Nobu週六早午餐 $858任食壽司/刺身
香港麗晶酒店Nobu Hong Kong坐擁維多利亞港壯麗全景，由星級餐廳主理人、頂級日本料理代表人物松久信幸先生（Nobu Matsuhisa）領軍， 呈獻揉合秘魯元素日本料理。餐廳除咗單點菜單之外，逢星期六都有供應豪華豐富brunch menu，每位$858享用多款美饌，包括特色小食、壽司、新鮮刺身、沙律等，當中壽司同刺身更加無限任食。想weekend過一個舒適週末brunch time，Nobu係唔錯好選擇。
中環葡萄牙餐廳Casa Lisboa $498任食葡式烤乳豬＋葡式海鮮飯
中環葡萄牙餐廳Casa Lisboa推出超值Weekend Brunch，每位只需$498即可任食招牌葡式烤乳豬同精選葡式飯，另外仲包前菜、海鮮主菜同甜品。每位成年客人更可免費獲贈葡萄牙青酒(Vinho Verde)或佩爾塞雞尾酒(Per Se Spritz) 一杯，享受周末假期！
灣仔Sophia Loren House$88任食優惠！pizza＋意粉＋凍肉拼盤
灣仔百年古蹟和昌大押有間人氣意大利餐廳Sophia Loren House，以Brunch任食拿坡里薄餅、手工意粉、Tiramisu出名，最近餐廳再加碼，推出超平$88優惠任食pizza、意粉、三文治、cold cuts、芝士，仲可以食足3個鐘，即刻睇詳情！
Mr. Steak Buffet＋沙田柏麗廳$378和牛自助餐！原條藍鰭吞拿魚即席解體
銅鑼灣 Mr. Steak Buffet a la minute聯乘沙⽥The Palate 柏麗廳，兩間餐廳用最優惠價錢，同步推出低至$268起奢華⽇本和牛自助餐！一次過品嚐到原條長崎藍鰭吞拿⿂、即開岡⼭縣⽣蠔同多款和⽜美饌、冰鎮海鮮、刺身等，和牛愛好者唔好錯過！
即撈海鮮火鍋放題九龍灣/荃灣分店！$298任食3小時海鮮＋過百款配料
即撈海鮮火鍋放題九龍灣店「千海水產海鮮火鍋放題」自開業就爆紅，訂座瘋狂爆滿！最近帶來好消息，宣布喺荃灣再開分店，價錢同Menu同九龍灣一樣，最平$298可任食3小時，任撈海鮮同過百款火鍋配料、熟食、甜品同飲品，想食但book唔到位嘅朋友把握機會啦！
北角海逸酒店$198午市點心放題
香港北角海逸酒店逸龍軒中菜廳最近推出午市點心放題，食客可以享受超過30種精緻點心同炒粉麵，食物款式豐富，包括傳統蝦餃同燒賣，仲有創新流沙包同星洲炒米等。每位客人仲可以享用原隻鮑魚同半隻紅燒皇子鴿，每位只需$198，長者同小童更可享有特別優惠，$168就食到！
富豪機場酒店推Sip & Sing自助餐！現場樂隊伴奏/15款甜品小食/手工啤
富豪機場酒店華岸酒吧扒房推出全新「Sip & Sing」吃、唱、玩、樂包羅萬有活動，每逢星期五晚上 6 時至 10 時「Sip & Sing」期間，顧客可享啤酒、小食，同埋由酒店現場樂隊伴奏喺舞台上獻唱嘅美妙機會。
