[[{“value”:”
韓式拉麵自助店／即食麵自助店在韓國好常見，不論是便利店或是專門店都有！最近在港島街頭竟然都發現一間，由揀麵、加水、落配料、滾起，全程都是自助形式，甚至仲有堂食用餐區，畀食客淥完都再慢慢食，整個體驗好得意，不用飛韓國都試到！
香港都有韓式自助即食麵店！韓國人主理：17款湯／撈麵自助揀
最近在港島北角內街，有一間韓式拉麵自助店悄悄進駐，引來網民和一眾識食之人關注。Noodle Bridge由韓國人主理，將韓國流行的自助拉麵店帶到來香港。有別於大多韓國店的是24小時營業，香港這間小店每日只開到9pm，但是由揀麵款到整個淥麵過程，跟韓國店一樣都是自助形式。
韓式即食麵自助店香港都有啦！設有堂食用餐位置供客人煮完麵後，慢慢食。（圖片來源：新假期編輯部）
一入舖頭，就會見到店子標誌的拉麵打卡牆，放滿各式各樣的韓版即食麵款式，如辛辣麵、炸醬麵、三養辣雞麵等共17種不同麵款。即食麵價錢$24-$30一份，除了即食麵，亦可以加購配料：$4泡菜、$4生雞蛋、$4芝士、$6/3條腸仔、$6/2片午餐肉。有網民批評：「$24食個即食麵太貴」、「返屋企食拉麵算啦」，但是亦有網民認為店舖夠綽頭，體驗新鮮。今次記者就實試整個過程，睇吓值唔值得到訪啦！
拉麵牆放有17款不同湯、撈麵款式，成為店子的標誌！（圖片來源：新假期編輯部）
全程自助淥麵！記者實試全程體驗
記者當日避開午市時間到店，店舖只有1-2枱客人，全店約有近10個座位，分別有高枱和2人座位。整個空間不算寬闊，一眼睇得晒。客人可以先到拉麵牆選擇心宜拉麵，再到收銀處付款，然後職員便會提供即食麵紙兜供客人淥麵。
付款後，職員會提供即食麵紙兜，客人便可以到自助煮麵區淥麵啦。（圖片來源：新假期編輯部）
店子設有6個淥麵機，淥麵區會張貼文字教學，指導客人如何㩒掣操作淥麵機，有疑問的話，亦可向在店職員查詢。
設有6部淥麵機，加水後會自動計時，水滾就食到啦！（圖片來源：新假期編輯部）
淥麵區張貼了教學，指引煮不同麵款需要按相應的按掣，指引清楚易明。（圖片來源：新假期編輯部）
湯麵和撈麵的煮法大同小異，都是先放好紙兜，再放上麵餅和調味料，然後加熱水，等待沸騰即可。如果加購了配料，職員亦會提供協助，指引客人何時要加入配料。整個過程方便，只要㩒幾個掣就食得，還有堂食用餐區，可以跟朋友約埋一齊食添。
放上麵餅和調味料，然後加熱水，等待沸騰即可。途中亦會有職員可提供協助。（圖片來源：新假期編輯部）
今次記者揀了最平湯麵款式：Jin Ramyun Spicy ($24)。亦可額外追加配料：$4泡菜、$4生雞蛋、$4芝士、$6/3條腸仔、$6/2片午餐肉。（圖片來源：新假期編輯部）
撈麵款則選了炸醬麵Chapagetti ($26)（圖片來源：新假期編輯部）
記者認為過程都好方便，帶多種麵款選擇，即使中途有疑問，都有店員在場解答。不過食物方面，即食麵定價最平$24，對街坊和學生而言，價錢略貴，如果連配料一併柯打都要近$30！但是綜觀而言，雖然即食麵定價比起便利店的貴，但是可以有全新的體驗和設有堂食區，對於放學後的學生或街坊，作為三點三下午茶，未嘗不可。
平日3點多到店，見到不少學生哥放學後都會幫襯。（圖片來源：新假期編輯部）
學生優惠仲可以減$10添！（圖片來源：新假期編輯部）
店名：Noodle Bridge
地址：北角和富道84-94號銀輝大廈地下2號舖
營業時間：星期一至日11am-9pm
The post 香港韓式拉麵自助店！最平$24起 全程自助DIY：17款即食麵＋打卡拉麵牆 appeared first on 新假期.
“}]] 飲食 – 新假期 Read More
