新假期全新欄目《搵食新煮意》，每日為你推介今日食乜好！除了提供不同菜式的食譜，讓你留在家中自煮，都可以輕鬆試盡各地佳餚滋味；更會為你推介近期值得一試的香港餐廳，在家煮以外亦有不少好選擇，留在香港都可以齊齊搵食！1月4日《搵食新煮意》：火山爆發蛋炒飯＋星空布丁。
1月4日搵食新煮意：火山爆發蛋炒飯＋星空布丁
1.火山爆發蛋炒飯
火山爆發蛋炒飯在濟州好出名！因為濟州由地殼運動而成，更有座知名的漢拿山，當地好多餐廳都有供應呢款「 漢拿山蛋炒飯 」。查實是人人食完辣烤魷魚，都會再加白飯炒埋個汁來吃，侍應會一邊砌個「漢拿山」，一邊淋蛋漿一邊介紹濟州的起源。這個飯賣相先聲奪人，睇到哇哇聲！
材料：
鮮魷魚 1隻
白飯 3碗
雞蛋 4隻
鮮奶 200ml
芝麻葉 4塊(切碎)
葱 少許(切碎)
紫菜 適量(切碎)
泡菜 適量
Mozzarella芝士 適量
調味：
麻油 半湯匙
韓式醬油 2湯匙
蒜蓉 半湯匙
辣椒醬 2.5湯匙
幼辣椒粉 1湯匙
芝麻 少許
鹽 半湯匙
黑椒 半湯匙
做法：
魷魚跟所有調味撈勻，備用；炒香泡菜，放入魷魚炒勻，放入白飯再炒。隨後加入芝麻葉、葱、紫菜、芝士炒勻成魷魚飯。將魷魚飯轉至燒紅的鐵板上堆砌成小山，中央壓成小洞，旁邊隨意拮出數個小孔。
發好雞蛋，拌入鮮奶成蛋漿，即可趁鐵板處於高溫時倒入蛋漿。
撒點芝士即成，待半溶狀態即可享用。
1月4日搵食新煮意｜1.火山爆發蛋炒飯（圖片來源：新假期資料庫）
2.星空布丁
位於日本草津溫泉街的一間布丁專門店「草津溫泉布丁」，自推出漸層星空布丁後大受歡迎，令不少港人都慕名而去。即使未必能到日本一嘗滋味，但有網友研發出食譜，不論味道及外型均完美還原，且製作簡單，漸層幻彩藍紫色勁呃Like。
材料（3至4杯份量）：
下層材料：
日本雞蛋 25g (先拌勻)
北海道牛奶 110g
糖 20g
魚膠片 2片（薄、用凍水浸軟，揸水）
雲呢嗱香油 2滴
上層材料：
蝶豆花粉 少許（自行調教顏色深淺）
熱水 10g
銀糖珠 5g
檸檬汁 少許（怕酸可先加少許幼砂糖拌勻）
水 300g
糖 25g
大菜絲 2g至3g（浸軟，揸水，剪碎）
下層做法：
用一小煲，加入日本雞蛋、北海道牛奶、糖，拌勻後用小火煮至攝氏60度。
混合物過篩，加入魚膠片，再拌勻。
當魚膠片溶化拌勻，再過篩。
加2滴雲呢拿香油，拌勻，再過篩。
布甸液變得滑溜無雜質。
平均倒入3個布甸杯內，放雪櫃約2小時。
上層做法：
用一小碗，加入蝶豆花粉、熱水、銀糖珠拌勻成蝶豆花水，備用。
另一煲加水，滾後加入大菜絲，小火煮至溶。
加入糖，攪拌至糖溶化。
熄火，加入蝶豆花水，拌勻。（*如想做全紫色，此時滴少許檸檬汁，拌勻）
待稍涼後，從雪櫃取出布甸杯，倒入蝶豆花水。（*如想頂部變成漸變紫色，此時立即滴幾滴檸檬汁，動作要快手！）
放入雪櫃冷藏至凝固。
1月4日搵食新煮意｜2.星空布丁（圖片來源：海沙媽媽 授權）
The post 火山爆發蛋炒飯＋星空布丁｜搵食新煮意（新假期APP限定） appeared first on 新假期.
飲食 – 新假期 Read More
