這間原本位於大圍小巷內的隱世小店，由兩兄弟主打日本洋食，憑著澎湃的流心蛋包飯成功爆紅！即使位置隱世，都吸引不少客人慕名而來一試。ADO洋食屋最近由大圍巷仔搬舖，到荃灣享成街！新店同樣會供應手打漢堡扒、紅酒燉牛肋條、日式布丁等，門外經長出現長長人龍，即睇更多詳情啦！
大圍隱世ADO洋食屋搬入荃灣！Band友兩兄弟拍住上創業
香港最近愈來愈多主打洋食屋的小店，這間原本位於大圍巷子裡的餐廳，開業約1年左右。最近轉戰荃灣，由兩兄弟一同主理，主打日本洋食如咖喱蛋包飯、日式漢堡扒、雞蛋布丁等。
大哥Samuel負責樓面及水吧，而細佬阿偉則主力菜式和廚房工作。阿偉本身是西餐廳的廚師，一直都想開一間屬於自己的店舖，而大哥亦默默支持細佬創業，因此兩兄弟便於大圍開店。而細佬更因為鍾愛日本的洋食文化，因此小店便朝著洋食屋方向發展。店名中的「ADO」更是取自兩兄弟的樂隊歌名而命名，好有意思。
大圍ADO洋食屋！由兩兄弟兼Band友合力主理，供應人氣日式洋食。（圖片來源：新假期編輯部）
小店的裝潢和擺設都有日系昭和風的味道，店舖細細卻吸引不少客人到訪。（圖片來源：新假期編輯部）
人氣激流心蛋包飯：丁點瑕疵都容不下
日本洋食是以西式烹調手法以日式精緻的方式呈現，對於阿偉而言，獨沽一味主打洋食的餐廳很少見。小店供應經典洋食，包括日式牛肉醬汁蛋包飯、手打日式漢堡扒、紅酒燉牛肋條、焦糖炒甜薯等菜式，其中蛋包飯成功突圍跑出，以超流心雞蛋吸引不少客人，不過廚師阿偉表示其實製作好考功夫，特別是這道菜的靈魂：雞蛋。老闆表示只用日本雞作製作，為了令雞蛋的形狀更完美，更特意從日本選購煎鍋專門製作蛋包飯。想雞蛋流心除了用料靚，時間和經驗都好重要，橄欖狀雞蛋要穩穩地落在番茄炒飯上而不倒塌，阿偉都花上幾個月時間才掌握技巧。另外雞蛋最好在1分鐘內切開，才不會因為過熟而失去澎湃的流心效果。「蛋包飯一搞砸了就是難以復原，所以出餐的時間雞蛋有什麼意外，如倒塌或不滿意，都一定會重新再做」，或許就是這份堅持才成功俘虜客人的胃。
經典日式牛肉醬汁蛋包飯$72，價錢親民，雞蛋好像軟綿綿的枕頭一樣放在番茄炒飯上，畫面好療癒！（圖片來源：新假期編輯部）
自家手打漢堡扒＋日式昭和布丁＋波子梳打雪糕
另一推薦菜式則是「Ado’s自家手打日式漢堡扒」，由牛肉和豬肉混合而成，再經由店家手打以拍走內裡空氣，令漢堡扒份量十足而且肉質結實，富口感。最後再淋上熬製上3小時的牛肉醬汁，熱呼呼送到客人手上，食完大滿足！食完主菜，當然要食埋甜品啦，焦糖布丁除了雞蛋、牛奶、忌廉等食材外，亦額外增添冧酒，令布丁食起來帶陣陣酒香，層次豐富。同時布丁的時間和口感都經過多次嘗試，所以口感實在又帶滑溜。
Ado’s自家手打日式漢堡扒$88，肉質厚實，淋上牛肉醬汁十分惹味。（圖片來源：新假期編輯部）
焦糖炒甜薯$42，每份均為即叫即炸，再淋上焦糖醬汁，食起來更加惹味香口。（圖片來源：新假期編輯部）
日式昭和布丁$52，是另一人氣食物，雞蛋布丁口感滑溜而且質感QQ，有別啫喱質感。（圖片來源：新假期編輯部）
ADO洋食屋位置隱世，位於小巷內，不過仍然無阻食客排隊等食！（圖片來源：新假期編輯部）
餐廳：ADO洋食屋
地址：荃灣享成街8號香城大廈地下5A號舖
營業時間：星期一至五11:30am-9:30pm，星期六至日8:30am-10pm
Facebook：adoyoshokuya
The post 大圍ADO洋食屋轉戰荃灣！Band友兩兄弟主理：流心蛋包飯/手打漢堡扒/布丁 appeared first on 新假期.
飲食 – 新假期 Read More
